ගංගොඩවිල සෝම හිමිව අපවත් කළත්, නැවතත් ජීවමාන කිරීමට පුළුවන.

සිංහල ජාතිය අසරණවැ දණින් වැටී සිටින යුගයන්හි දී
නැවතත් ජාතිය කෙළින් සිටවීමට යුග පුරුෂයින් පහළවීම
හෙළ ඉතිහාසයැ පුරාවට මෙන් මැ අනාගතයේදීත් සිදු වන්නකි.

එක් අතකින් බෙදුම්වාදී ත්‍රස්තවාදයෙන් රට දෙකඩ වෙමින් පවතිද්දී…
තවත් අතකින් සිංහලයාගේ සාරධර්ම පිරිහී යද්දී…
එ අතර අන්‍යාගමික මූලධර්මවාදීන් විසින් බෞද්ධයන්ව බිලි බා ගනිද්දී…
ජාතියේ පිණට ප්‍රදීපස්ථම්භයක් පහළ විය.
ඒ අපගේ ගෞරවණීය සෝම හිමිපාණෝය.

නැණ පහණේ සිට ඈත ගම් දනව් සිසාරා වඩිමින්
සිංහල බෞද්ධයන්ව දැණුවත් කළ උන්වහන්සේ
වික්ෂිප්තවැ මුසපත්වැ සිටි සිංහල බෞද්ධයන්ට
අර්ථයෙන්ද ධර්මයෙන්ද දේශනා කරමින්
නව ජාතික ඉලක්කයක් ඇති කළ සේක.

සම්දි‍ටු දෙවියන්ව පසෙකළා මිසදි‍ටු දෙවි සරණ යමින්
හෙළැ සිරිත පසෙකළා බටහිර දෑ සරණ යමින්
මැතිවරණයකදී විතරක් ජාතිකත්වය සිහි වෙමින්
රුපුන් සමග පෙම් බස් දොඩමින්
අයාලයේ ගිය බොහෝ සිංහලයෝ
සෝම හිමි නම් දිවාකරයාගේ රෂ්මි ධාරාවෙන් ඔකඳව
මඩෙන් පිපි පියුම් සේ, විකසිත වන්නට විය.

ජාතිවාදී හංවඩුව ගැසෙන නිසා
“මම සිංහල බෞද්ධයෙක් මි” යැයි
රහසේවත් කීමට සිංහලයෝ බිය වූ යුගය අවසන් විය.
පරළොවක් ගැන සිතුවේවත් නැති තරුණ තරුණියෝ
සුදු වතින් සරසී, එකාවන්ව
සිරි වජිරඤාණ ධර්මායතනයේ සිට 
ඈත ගම් දනව්වේ පන්සල දක්වාම
පෝ දා පෙහෙවස් සමාදම් වූහ.
සිංහල ජාතිය ‍රැක ගැනීම වස්
ජනබලවේග එක් ‍රැස් වන්නට විය.

නැගී එන සිංහල බෞද්ධ බලවේගය ගැන
අති බහුතරයක් අපේ ඇත්තන් උද්දාම වෙද්දී
එදා සිටම තමන්ගේමැ එවුන්ට වින කළ සමහරක් උදවිය
සෝම හිමිගේ දිවිය යටපත් කිරීමට කටයුතු කෙරුවෝය.
ඇස් රෝහලක් සෑදීමට ආධාර දෙන මුවාවෙන්
උන්වහන්සේව රුසියාවට වඩම්මවා
දැයට මිණි පහන අහිමි කරවූවෝය.
එමගින්ම සෝම හිමිව පමණක් නොවැ
උන්වහන්සේ වටා ගොඩනැගුන ප්‍රතිරූපයත් විනාශ කිරීමට
මූලධර්මවාදීහු නරුම උත්සාහයක් ගත්හ…

ප්‍රදීපයක් නිවී ගියද එහි රශ්මිය පවතින්නාක් සේ
අපේ සෝම හිමි එදා දැයට ලබා දුන්
අවවාද සහ අනුශාසනා තවමත් අප සමග තිබේ.
පහත දැක්වෙන්නේ උන්වහන්සේගේ අවසාන දේශනයයි.
ජාතිහිතෛශීන් ශ්‍රවණය කරත්වා.!

ක්‍රි.පූ 161 දී දෙ‍ටුගැමුණු – ඵළාර යුද්ධයේදී
සිංහලයින්ට අත් වු විජයග්‍රහණයට නව පරිච්ඡේදයක් එක් කරමින්
තුන් හෙළය නැවතත් එක්සේසත් කළ සිංහ සේනාවන්ට
යෝධ ශක්තියක් වුන සිංහල බෞද්ධ බලවේගයට පාර කැපුවේ
අපගේ සෝම හිමිපාණන්ය.
එහෙත් ඒ ගමන නන්දිකඩාල් වලින් අවසන් වූවේ ඇයි?…

පූජ්‍ය ගංගොඩවිල සෝම හිමි යනු
හුදු පුද්ගලැ ප්‍රතිරූපයක් පමණක් නොවේ,
“ජාතික ප්‍රතිරූපයකි”…
එවැන්නෙක්ව බාහිර පාර්ශවයකට විනාශ කර දැමිය නොහැකිය.
එනිසා සෝම හිමි නම් ජාතික ප්‍රතිරූපය අපවත් කෙරෙන්නේ
අදින් වසර අටකට පෙ‍රැ නොව
උන්වහන්සේගේ අවවාද දනෝ නොපිළිපදින විටැ ය.

උන්වහන්සේව නැවතත් ජීවමාන කළ යුතු මැ නම්
එදා අපට ලබා දුන් අවවාද අනුශාසනා පිළිපදීමට
අප සියල්ලන්ම අදිටන් කරගත යුතුය.

“සිංහල බෞද්ධ අපි පස් පව් වලින් සම්පූර්ණයෙන් මැ වැළකෙමු
මිසදි‍ටු ඇදහීම් වෙනුවට සම්දි‍ටු පිළිපැදීම් වලට යොමුවෙමු
බුදුන් වදාල මාර්ගයේ ගමන් කිරීමට උපරිම උත්සාහය දරමු
බුදු දහමෙන් ලොවම ඒකාළෝක කිරීමට පෙළගැසෙමු
සිංහල ජාතිය වඳ වී යාම වළකාගමු
සිංහල දේශය යළිත් දෙකඩ වීමට ඉඩ නොතබමු
බටහිරයින්ට මව් බිමට අත තැබීමටවත් ඉඩ නොතබමු
අන්‍යාගමික මුලධර්මවාදීන්ගෙන් සසුන ‍රැකගමු.“
අන්න ඒ දේවල් අපි කරන දා
ගංගොඩවිල සෝම හිමියන්ගේ ජාතික ප්‍රතිරූපය
නැවතත් ජීවමාන වේවි

දැනට වැඩ සිටින සඟ පිය වරුන්ටත් සිව්පසයෙන් උපකාර කරමින්
උන්වහන්සේලාව ද්වේශසහගතව විවේචනය කිරීමට නොගොස්,
‘රහසෙම නික්මී තිබුනා!’ , ‘අහෝ අද නෑ!’ ආදී
පශ්චාත්තාපයන් සිදුකරගැනීමට ඉඩ නොතබා
දිවි හිමියෙන් ‍රැක ගනිමු.

තෙරුවන් සරණයි.!
ශ්‍රී බුද්ධ වර්ෂ දෙදහස් පන්සිය පනස් පස් වැන්නේ උඳුවප් මස පුර පෑළවිය නම් තිථිය ලත් සඳු දා.